Blog

27 ABR

'Agora somos tres', comezo dunha nova primavera para Cumio Editora

O vindeiro 5 de maio chegará ás librarías o novo título de Giorgio Volpe e Paolo Proietti, unha continuación de ‘Antes de durmir’ o primeiro conto publicado por Cumio Editora desde que volvese á actividade en abril do ano pasado
'Agora somos tres', comezo dunha nova primavera para Cumio Editora

Semella que foi onte, pero xa pasou un ano desde que Cumio Editora volvese ao oficio de xuntar letras para un público ansioso de novas aventuras. A primavera será para sempre unha estación insignia na editora galega, pois a estación é o marco no que transcorre a primeira historia desta segunda etapa, ‘Antes de durmir’, e tamén, xunto co bosque, da súa segunda parte, ‘Agora somos tres’

A tradución ao galego, e ao castelán, destas pezas de prestixio internacional son unha clara aposta por darlle ao público galego a posibilidade de acceder a contidos universais e por permitir que as máis peques das familias poidan gozar de grandes historias na súa lingua.

Precisamente nesta liña camiña o novo título dos italianos Giorgio Volpe e Paolo Proietti, que chegará ás librarías o vindeiro 5 de maio, e que continua a historia dos inseparables amigos Chío e Pelo Roibo, que volven xuntarse no bosque cando o pequeno leirón esperta da súa hibernación. Nesta nova aventura, e novamente na primavera, un novo amigo, que o raposo fixo mentres o leirón durmía, únese ás vivencias dos protagonistas de ‘Antes de durmir’.

Da historia encárgase Giorgio Volpe, e faino, nunca mellor dito, de fábula. Así, introdúcenos nun ambiente cheo de tenrura, onde valores como a amizade, o respecto a diversidade ou a diversión vencen a paixóns negativas como os celos. Por se isto fose pouco, as ilustracións de Paolo Proietti son, e non descubrimos nada, unha auténtica marabilla visual ao alcance duns poucos elixidos. Ninguén coma el para ilustrar unha primavera que veu para quedarse.

 

SINOPSE

Continuación da historia protagonizada por Chío e Pelo Roibo de "Antes de durmir" de gran éxito internacional abordando temas coma os celos, segredos e inclusión. Ao pequeno raposo non lle gusta o inverno porque o seu amigo o leirón hiberna e el queda só. Pero esta vez atópase cun teixugo, Bas e faise amigo del. Xuntos divírtense moito e, cando chega o momento en que Chío (o leirón) esperta, o raposo non sabe se presentar ao novo amigo ou esconderlle esta novidade.

O temor de que o leirón poida querer ao teixugo máis que a el fréao de revelarlle a verdade. Así trata de ocultalo dividíndose entre os dous amigos. Pero a maneira de comportase do pequeno raposo fai que Chío sospeite e pronto descobre a existencia de Bas. Os tres convértense en grandes amigos e dannos unha gran lección, no corazón de cada un de nós hai lugar para moitos amigos aos que querer.

'ANTES DE DURMIR'

Unha delicada historia que fala da amizade e a importancia e respecto pola diversidade. Especialmente durante a infancia, as amizades tenden a abarcar todo, pero a través dos dous doces protagonistas, os pequenos lectores aprenderán que cada amigo é diferente.

Coa chegada da primavera, as cores, o sol e a vida volven ao bosque. O pequeno raposo está moi nervioso por que sabe que é agora cando poderá gozar dos que mais desexa, a compañía do seu mellor amigo, un pequeno leirón que hiberna nos períodos de inverno. Ambos pasan o tempo e gozan do que a natureza lles ofrece neses momentos únicos como correr, revolcarse entre as follas e mesmo xogar ás agochadas. Pero hai algo no corazón do pequeno raposo que lle impide ser feliz, xa que a medida que pasan os días ve máis preto o próximo outono e inverno, momento no cal o seu mellor amigo retírase a durmir...

Preciosa e cálida historia acerca da amizade, a dependencia, a diversidade e o ánimo positivo nos momentos vividos por moi curtos que sexan.

 

Volver