O CAMIÑO FRANCÉS EN GALICIA
Manoel Santos e Onofre Sabaté

O Camiño Francés é a ruta por excelencia, a vía pola que millóns de peregrinos veñen chegando a Santiago desde que o mito saíu á luz en Libredón, en Compostela.
É no Cebreiro, a sorprendente aldea das pallozas, o santuario e o Graal, onde comeza en Galicia. Ábrese paso entre as chamadas montañas orientais. Os Ancares ó norte e O Courel ó sur, quizais os lugares naturais máis salientables do noroeste peninsular.

11,5 x 22,5. 84 páx. 7,90 €
I.S.B.N.: 84-8289-261-4

A RUTA DO MAR DE AROUSA
Antón Mascato, Manoel Santos e Onofre Sabaté

Contan que o Apóstolo Santiago chegou do mar, como o pobo galego. Que os seus restos arribaron ao entón porto de Iria Flavia tra-lo seu martirio, en Xerusalén, alá polo ano 44. Que dende o peirao de Jaffa, Teodoro e Atanasio, os seus discípulos, portaron en barca os restos ata chegar a unha amplia ría, a de Arousa. Fóra do lendario e do litúrxico, esta ruta imaxinaria discorre por un dos grandes bastións naturais do litoral de Galicia. Chámanlle a Ruta do Mar de Arousa.

11,5 x 22,5. 120 páx. 7,90 €
I.S.B.N.: 84-8289-265-7

OS CAMIÑOS DO NORTE EN GALICIA
Manoel Santos e Onofre Sabaté

Polos camiños do norte entraron xa antes do século X os reis ástures e tódolos que vivían na Península non arabizada.
Sempre foron dous, o Camiño Alto, ou do norte, que entraba en Galicia por Ribadeo, e o Camiño Primitivo, ou da Fonsagrada.

11,5 x 22,5. 96 páx. 7,90 €
I.S.B.N.: 84-8289-263-0

O CAMIÑO PORTUGUÉS EN GALICIA
Manoel Santos e Onofre Sabaté

O Camiño Portugués é a ruta de entrada a Galicia que atravesa o Miño entre Valença e Tui. Os portugueses elixían entre o camiño da costa, polo Porto, ou o do interior, pola Ponte de Lima, para acceder á cidade fortaleza de Tui, aínda que os de máis alá percorrían vieiros como o de Chaves ou o de Celanova para incorporárense á Vía da Prata.
A localidade tudense, Pontevedra ou Padrón están entre as vilas monumentais máis sobranceiras deste camiño que vén sur.

11,5 x 22,5. 84 páx. 7,90 €
I.S.B.N.: 84-8289-259-2

O CAMIÑO INGLÉS EN GALICIA
Manoel Santos e Onofre Sabaté

A terras coruñesas e ferrolás chegaban non poucos peregrinos vía marítima dende, polo menos, o século X, pero en máis número arredor do século XIV. O seu camiñar cara a Santiago de Compostela deu lugar a este Camiño Inglés que atravesa un gran número de lugares de interese cultural e natural.
A vila de Ordes, ou máis ben antes, por Santiago de Sigrás e o antigo hospital de Bruma, fai de punto converxente entre dúas apaixoantes posibilidades, A Coruña e Ferrol.

11,5 x 22,5. 96 páx. 7,90 €
I.S.B.N.: 84-8289-260-6

A VÍA DA PRATA EN GALICIA
Manoel Santos e Onofre Sabaté

Gran parte de Portugal e do centro-sur da Península comunicábase coa vila xacobea pola Vía da Prata, un percorrido de comerciantes que antes fora itinerario de conquistas árabes e reconquistas cristiás, de comercio mineral e de ofrendas que chegadas das Américas tiñan como destino expiar pecados en Compostela. Discorre en parte polo trazado dunha antiga vía romana da Gallaecia. É o máis longo dos camiños de Santiago en Galicia.

11,5 x 22,5. 96 páx. 7,90 €
I.S.B.N.: 84-8289-262-2

O CAMIÑO DE FISTERRA
Manoel Santos e Onofre Sabaté

Non eran poucos os peregrinos que continuaban a viaxe dende Compostela polo Camiño de Fisterra para chegar ás máxicas terras da Costa da Morte, á fin do mundo, ó Finis Terrae onde os romanos adoraron ó sol. Aquí acababa o mundo no medievo e quizais tamén o faga hoxe en día.
Tanto a ruta do litoral como a do interior realizábanse ben dende Santiago ben cara a esa cidade, pois eran moitos os peregrinos que arribaban ós miúdos portos da Costa da Morte.

11,5 x 22,5. 84 páx. 7,90 €
I.S.B.N.: 84-8289-264-9